--------------------------------------------------------------------------------
فكره مفيده جدا
بالله عليكم محدش يفوتها
القصه ده خياليه الغرض منها محاوله تخيل الوضع ممكن يبقي ايه لكن ماحدش يعرف حيحصل ايه في اللحظه دي غير ربنا سبحانه وتعالي.
قمت من النوم فجأة
في عيني نور غريب وقوي جدا
إستغربت النور ده كله جاي منين
و اندهشت لما لقيت الساعه بتشاور علي 3 صباحا
وان مصباح الغرفه مطفي
طيب النور ده كله جي منين
وانفزعت لما لقيت نص ايدي جوا الحيطه
شديتها بسرعه
خرجتها
وانا ببصلها بكل اندهاش
رجعتها تاني لقيتها دخلت جوا الحيطه
استغربت ايه اللي بيحصل ده
وسمعت صوت ضحك
بصيت ناحيته
لقيت اخويا نايم جنبي
ولقيته بيحلم
كان بيحلم انه راكب عربيه اخر موديل
وانه رايح حفله كبيره اوي
فيها ناس اغنيا اوي
وانه لابس اغني واحلي واشيك لبس
علشان يكون احلي واحد في الحفله
وكان بيضحك وفرحان
فاندهشت وسألت نفسي
(انا عرفت ازاي هو بيحلم بايه)
بعدين اتفزعت اوي من اللي بيحصل
وقمت من علي السرير
وجريت علي اوده ماما وبابا
وقعدت اصحي في ماما واطبطب عليها
واناديها بس ما كانتش بترد عليا
فقعدت اناديها كتير واطبطب عليها
وفجأه
لقيتها قامت من النوم
وكانت مخضوضه جدا
وبتبص يمين وشمال
قولتلها يا ماما انتي مش شايفاني!
لقيتها مش بترد عليا
ولا بتبصلي
قعدت انادي عليها
ماما
ماما
كانت حاطه ايدها علي قلبها
وبتقول
بسم الله الرحمن الرحيم
لقيتها بتطبطب علي بابا وبتصحيه
ولما قام
قالتله قوم نطمن علي الاولاد
قالها ده وقته
قالتله معلش قلبي مش مطمن
في حاجه غريبه
وانا واقف مستغرب
قعدت اقولها يا ماما
انا اهو يا ماما
انتي مش شايفاني ولا ايه
يا ماما
قامت ومشيت
فحاولت امسك هدومها
لكن الهدوم كانت مش بتتمسك
فجريت ووقفت قدامها
لقيتها عدت من جوايا
ما لقيتش غير اني امشي وراها
وبابا كان ورايا
ما حاولتش ابصله
علشان ما يتجاهلنيش هو كمان
ودخلت ماما الاوده وفتحت النور
مكنش عندي اي فرق
لان الدنيا كانت منوره اصلا
انفزعت لما لقيت نفسي نايم علي السرير
وقعدت ابص لجسمي وايدي وانا مستغرب
انا ازاي بقيت اتنين
انا مين
ومين اللي نايم علي السرير ده
وقطع استغرابي جمله بابا
استريحتي يا ستي
اهم نايمين اهو
لكن
هيا قالتله معلش
انا عاوزه اطمن علي محمد
ولقيتها بتقرب مني
قصدي من الشخص اللي نايم مكاني
وبتطبطب عليه
كانت بتقوله يا محمد
لكن هو مش بيرد
وكانت بتطبطب بشويش
وبدأت تهز جامد
جريت عليها
وقولتلها يا ماما انا اهو
ردي عليا
لكن صوتها كان بيزيد خوف وبيعلي
كانت بتنادي
محمد......محمد
وفجأه صرخت
ولقيت الصرخه بتوجعني اوي
كانها بتضربني
بكيت
وقولتلها ما تصرخيش يا ماما
وهيا بتقول محمد...محمد
وبابا جري عليا وحط ايده علي وشي وصرخ وبكي
وحسيت بالوجع تاني
محمد مش بيرد
والبكاء بيزيد وانا مش عارف اعمل ايه
صحي اخويا علي الصوت وهو بيسأل في ايه
ماما صرخت وقالت
اخوك مات يا احمد
ماااات
وانا بقولها ببكائي لا والله يا ماما
انا اهو شوفيني
انتي مش سامعاني
لكن مفيش فايده
بصيت للسما وقولت
يارب ايه اللي بيحصل ده
لكن ما لقيتش فوقي سقف
وشوفت ناس كتير
ولما شوفتهم مشيوا
وحسيت بطعنه غريبه
وحاجات بتقطعني
بصيت لاحمد لقيته بيصرخ
قولتله اسكت انت كده بتعذبني
لكنه كان بيزيد في الصراخ
وماما بتبكي في حضن بابا
والنحيب بيزيد
ووقفت قدامهم عاجز ومذهول
رفعت راسي تاني وقولت يا رب
ايه اللي بيحصل ده يا رب
فيه ايه
وسمعت صوت من كل حته
كان جاي من بعيد
ركزت معاه
لقيته بيعلي ويزيد
كأنه قرآن
والصوت بدأ يقوي
يقوي اوي
هزني من شدته
كان بيقول
(( لقد كنت في غفله من هذا فكشفنا عنك غطاءك فبصرك اليوم حديد))
وفي ذهول الصمت
لقيت ايدين بتطبق عليا
اتنين شكلهم مش من البشر
بيقولولي تعالي
قولتلهم انتم مين
وعاوزين مني ايه
شدوني
صرخت
سيبوني
ما تاخدونيش من اهلي
اهلي فاكرني مت
قالولي ما انت فعلا مت
قولتلهم ازاي
ما انا شايف اهو وبتكلم وحاسس بكل حاجه
ابتسموا وقالوا
عجيب امركم يا بشر
كلكم فاكرين ان الموت نهايه الحياه
وما تعرفوش ان حياتكم موت
وحلم طويل
حتصحوا منه علي اليوم ده
علي العالم ده
سالتهم انتم مين وواخدني علي فين
قالولي احنا حراسك لحد القبر
اتفزعت
قبر ايه
انتوا حتدخلوني القبر؟
ردوا
كل انسان لازم يدخل القبر
ده مكتوب علي كل البشر
طول عمري كنت بكره الكلمه دي
ما بحبش اسمعها
بستعيذ بالله منها وبحاول انساها
ما كنتش بقدر اتخيل نفسي في المكان ده
سالتهم بخوف
هتسيبوني
قالولي مع عملك
طيب وعملي ده كويس
سكتم
ولقيت واحد بيصرخ وبيبكي وواحد تاني سعيد اوي
وكل واحد فيهم واقف معاه اتنين بردو زي اللي معايا
سالتهم ده بيبكي ليه
قالوا
ده عارف مصيره
طول عمره كان من اهل الضلال
قولت يعني رايح النار
واللي بيضحك ده رايح الجنه؟
طيب انا رايح علي فين؟
قولولي
فردوا عليا
هما كانوا عارفين هما ايه في الدنيا
ودلوقتي عارفين هما فين في الاخره
وانت عشت طول عمرك
تايه
متردد
شويه تمشي صح
وشويه تمشي غلط
شويه تتوب وشويه ترجع للمعصيه تاني
ما كنتش واضح
حتفضل بردو النهارده
تايه مش عارف حاجه
اتفزعت وقولت
ايه
يعني ايه
انا رايح النار
قالولي رحمه ربنا واسعه
ولسه المشوار طويل
بصيت ورايا لقيت عمي
وابويا واخويا
ماشيين وراهم امي واهلي
بيبكوا
شايلين صندوق
جريت عليهم
ناديت
ماحدش بيرد
ناديت علي ماما
قولتلها يا ماما ما تبكيش
ادعيلي
وناديت علي بابا
قولتله يا بابا
خلي بالك من ماما واخويا
وناديت علي احمد
قولتله يا احمد خلي بالك من نفسك
وسيبك من الدنيا ومتاعها
دي رخيصه اوي
صدقني مش حتنفعك
ناديتهم كلهم
بس كانوا مشغولين بالبكاء
وماحدش سامعني
ماكنتش بتمني حاجه في اللحظه دي
الا انهم يسمعوني
وشدني الملكين
ونزلوني القبر
ونيموني فوق الجسد
علشان اشوف ابويا وهو بيرمي التراب عليا بنفسه
وعشان اشوفهم وهما بيودعوني
وخوفي عليهم
انهم مش حاسين باللي انا حاسه
وحسدي ليهم انهم لسه في الدنيا
بس للاسف
كنت ببكي وهما بيبكوا
كنت خايف عليهم من الدنيا اوي
واتمنيت لو اني اصرخ ويسمعوني
وخرجوا كلهم
وسابوني لوحدي
وقفلوا الباب
والنور اتحول سواد
اعمل للدنيا بقدر بقائك فيها
واعمل للآخره بقدر بقائك فيها
واعمل لله بقدر حاجتك اليه
واعمل من المعاصي بقدر ما تطيق من العقوبه
ولا تسأل الا من لا يحتاج الي احد
واذا اردت ان تعصي الله..فاعصه..في مكان لا يراك فيه
من فقد الله فماذا وجد
ومن وجد الله فماذا فقد
موضوع: الاستيقاظ من النوم 
الأحد مايو 24, 2009 3:02 am